Në një kohë kur tregu është më dinamik se kurrë, pyetja që çdo sipërmarrës i suksesshëm duhet të bëjë vetes është: “Si të fitoj më tepër para në biznesin tim?”.
Eri Business Coach ndan 8 strategji praktike që çdo biznes mund t’i zbatojë për të rritur të ardhurat, për të zgjeruar ndikimin dhe për të pasur një ekip më të motivuar.
Më poshtë janë tetë mënyrat konkrete që mund të transformojnë mënyrën si e zhvillon biznesin tënd:
1. Zgjero tregun
Shumë biznese janë të përqendruara vetëm në një treg lokal dhe mendojnë se kjo mjafton. Por nëse dëshiron më shumë të ardhura, duhet të zgjerojë tregun tënd. Kjo nuk do të thotë domosdoshmërisht të hapësh dyqane të reja fizikisht. Sot, teknologjia të jep mundësi të shërbesh jashtë qytetit tënd, madje edhe jashtë vendit, përmes:
- Shitjeve online
- Reklamave në rrjetet sociale
- Platformave ndërkombëtare të tregtisë
E rëndësishme është të mos e lësh fatin e biznesit në duart e klientëve “gojë më gojë”. Shfrytëzo çdo mundësi për të hyrë në tregje të reja, sepse aty qëndron rritja reale.
2. Kalo komunikimin me klientët online
Në vend që klienti të vijë gjithmonë fizikisht në biznesin tënd, mundësoji atij komunikim dhe shërbim virtual. Ja disa mënyra:
- Takime në Zoom apo Google Meet
- Konsultime përmes chat-it në Instagram, WhatsApp apo Facebook
- Shërbim klienti përmes telefonit apo emailit
Në këtë mënyrë, jo vetëm kursen kohën tënde dhe të klientit, por rrit mundësinë e shitjes, pasi nuk ke barriera fizike. Kështu, edhe nëse klienti është në Itali, Gjermani apo SHBA, ti mund t’i shërbesh atij me profesionalizëm.
3. Rrit numrin e klientëve idealë
Për të fituar më shumë para, duhet të njohësh më mirë klientin ideal. Eri sugjeron të bësh këtë ushtrim:
- Bëj një listë të 10 klientëve që kanë shpenzuar më shumë
- Analizo nga erdhën: nga reklamat, nga referimet apo nga rastësitë?
- Diskuto me ekipin tënd pse këta klientë kanë blerë dhe si mund të tërheqësh të tjerë si ata
Ky analizim të ndihmon të fokusohet tek burimet më efektive të marketingut dhe të multiplikosh klientët më të vlefshëm.
4. Zgjero zonën e influencës
Nëse ke një produkt për një kategori të caktuar (p.sh., gra 25–35 vjeç), shiko mundësinë të shtosh kategori të reja:
- Shto produkte për meshkuj nëse ke vetëm për femra
- Shto një gamë moshe më të re apo më të vjetër
- Shto një version më ekonomik apo më luksoz të produktit ekzistues
Me këtë qasje, rritet zona e ndikimit të biznesit dhe për rrjedhojë, edhe fitimet e tua.
5. Dyfisho vlerën nga stafi yt
Një nga mënyrat më të forta për të rritur fitimet është të dyfishosh produktivitetin e stafit. Eri sugjeron të planifikosh në mënyrë graduale një rritje të pagave, por vetëm nëse kjo shoqërohet me rritje performance.
Ky plan nuk është për t’u bërë menjëherë, por me faza:
- Vendos një objektiv për 6 muaj ose 1 vit
- Prezantoje me ekipin si vizion dhe plan afatgjatë
- Lidhe rritjen e pagës me objektiva të qarta, jo vetëm me kohë pune
Stafi që ndihet i vlerësuar dhe sheh një të ardhme të sigurt, nuk largohet dhe jep më shumë.
6. Shiti më shumë klientëve ekzistues
Të fitosh një klient të ri kushton më shumë se të shesësh sërish një klienti ekzistues. Krijo:
- Një version premium të produktit ekzistues
- Një ofertë luksoze për klientët që duan më shumë
- Një paketë më të plotë për ata që duan shërbim të avancuar
Ky produkt nuk është për shumicën, por për ato 2% të klientëve që duan diçka ndryshe dhe janë të gatshëm të paguajnë më shumë.
7. Kërko më tepër nga stafi
Mos mbaj një kulturë ku kënaqësia e tanishme është e mjaftueshme. Ngriti objektivat! Kërko më tepër pa presion, por me qartësi:
- Vlerëso arritjet, por kërko rritje personale dhe profesionale
- Përdor objektiva dhe KPI të matshëm
- Krijo një frymë që motivon për zhvillim, jo vetëm për stabilitet
Në këtë mënyrë, çdo punonjës do kërkojë më shumë nga vetja, dhe kjo do përkthehet në më shumë të ardhura për ty.
8. Mos harro të reflektosh dhe të veprosh
Në fund të ditës, nuk mjafton ta lexosh këtë artikull. Siç thotë Eri Business Coach, veprimi është ai që sjell rezultatin. Merr secilën nga këto 8 teknika dhe:
- Diskutoje me ekipin tënd
- Zgjidh një apo dy që do të implementosh këtë muaj
- Vendos një afat dhe mat rezultatet
